اسرع استقالة

انا انهارده اتبهدلت خالص
قولت اعمل نفسى صحفية واحافظ على المجال اللى انا هتخرج منه واشتغل فيه اجرب
صاحبتى قالتلى هكلملك الاستاذ اللى بتشتغل معه فى صوت الامة
وكلمته وقالها هاتيها معاكى وبالفعل روحت معها امبارح
طبعا الرجل شافنى مش عارفة حاجة عن صوت الامة ما انا عمرى ما مسكتها
قاللى اقراى صوت الامة وتعالى تانى يوم الاحد وبعدين قاعدنا نقرا الجرائد وفى الاخر طلعنا موضوع نعمله وقال لصاحبتى انزلى اعمليه وقالى انزلى معها و روحنا
ليبدا يومنا انهارده من الساعة 11 من من عند باب محطة مترو السيدة زينب (واحلى حاجة ان انا راح ماما وبابا وصلونى )واخذت صاحبتى وروحنا شركة الكهرباء فى السيدة زينب وطبعا ما عرفناش حتى ندخل من على الباب ووقفنا نتكلم مع الامن وما عرفناش نخرج منه بحاجة غير ان المشكلة كلها راحت الشئون القانونية فى 53 ش 26 يوليو وواحد قال انها راحت قسم السيدة زينب
قولنا نروح قسم السيدة زينب وهناك ماعرفناش نوصل لاى حاجة اعدنا نزلين طالعين طالعين نزلين بندور على دفتر المحاضر وفى الاخر قالنا هاتوا اسم صاحب المشكلة وبعد كدة خرجنا
قولنا نروح الشئون القانونية وروحنا هناك بس المرة ديه عرفنا حاجة اسماء الموظفين اصحاب المشكلة فقط وبعد كدة روحنا بيتنا
انا اتبهدلت خالص و قررت اقدم استقالتى وما انزل تانى وما حدش يقولى انزلى جربى ده معرفش الشغل ايه وكدة مش هنزل غير لو هنزل فى القسم الخارجى

خلاص انتهت الجامعة

فى يوم الخميس 14/6/2007 كان اخر يوم فى امتحانات الجامعة
طبعا هى مش زى كل سنة ولا زى اى اخر يوم فى الامتحانات
اصل السنة ديه اخر سنة فى الكلية
على الرغم ان الكل فرحان ان الامتحانات خلصت وان شاء الله تكون اخر مرة نذاكر فيها لكن كانوا زعلانين جدا مش عارفين
هل ممكن نتقابل تانى اكيد كل واحد هينشغل فى حياته وهينسى التانى بعد اربع سنين جامعة خلاص بنسلم على بعض وبنقول اشوفكم بالصدفة كان احساس صعب
ده كان بالنسبة لى زملائى
لكن بالنسبة لى كان حاجة تانية
اكيد كنت زعلانة جدا فى ناس كتير جدا مش هقدر اشوفهم ولا اكلمهم لانى مش معايا رقم تليفونهم وفى معايا رقم تليفونهم لكن برضه مش هقدر اكلمهم كتير
فعلا انا مش زعلانة بس على الناس اللى هفتقدهم لكن انا لى ذكريات كتير فى الجامعة وخاصة سنة رابعة اللى هى انتهت خلاص
انا فعلا فى رابعة حصل حاجات كتير فى حياتى فيها الآم وافراح
قررت فيها انى اتغير ان اكون انسانة تانية وكان تحدى لنفسى كبير
واقدر اقول ان انا فعلا اتغيرت تقريبا
طبعا التغير ده مش كلى لكن فى حاجات اتغيرت
احب اقول ان نظرة التشاؤم اللى كان فى حياتى قدرت اغيرها واصبحت متفائلة

كمان فى سنة رابعة كنت اول مرة بروح فيها رحلة مع الجامعة وكانت يوم فى اسكندرية انا اقدر اقول اللى انا كتبته فى مذكرتى (مذكرتى ديه كانت من الحاجات اللى اتغيرت فيا اصل انا ما كنتش بدون اى حاجة فى حياتى ) عن اليوم ده هوماكنش كتير بس ده كان احساسى
(احلى يوم انا قضيته فى اسكندرية , كنت لاول مرة بشوف فيها اسكندرية على الرغم ان انا روحتها كتير جدا, وكانت الصحبة اكثر من رائعة , وما حدث فى هذا اليوم لا ينسى )
بجد رحلة اسكندرية ديه عايزة بوست لوحده

كمان فى سنة رابعة اتعرفت على ناس كتير اصل انا مش اجتماعية اوى مش بعرف اتعرف على الناس اوى حتى لما بعرفهم مش بقدر اقرب منهم لكن اتعرفت عليهم وقربت منهم وفى ناس انا عارفهم اصلا بس قربت منهم فى رابعة غير الصورة اللى كنت رسمها لهم طلعوا حاجة تانية خالص
ده كمان فى ناس انا اخذت منهم موقف ومش بقيت عايز اكلمهم

كمان تعبت اصحابى جدا اللى معايا فى الجامعة من احلى الذكريات ان احنا كنا كل يوم بنشد فى المترو بصراحة كنت مجننهم كنت على طول متاخر وبروحهم متاخر بسببى على فكرة اصحابى هم شلتى لكن انا قربت منهم وفهمتهم جدا فى رابعة هم (هبه ديه بقى انا زعلانة على فرقها جدا احنا ان شاء الله هنحاول ان الصلة بنا ما تنقطعش
شيماء كانت على طول على خلاف معايا بس بحبها لان انا حسيت ان هى بتحبنى
ريهام ديه بقى دمها خفيف اوى بس كانت بتحرجنى كتير بسبب هزارها )

اه نسيت اقول على حاجة مهمة جدا على المكان اللى انا بحبه فى الجامعة
كنت على طول اعدة على السلم فى الكلية جنب الحائط ولو كان حد اعد مكان ببقى زعلانة جدا وعايزة اقومه

على فكرة انا عرفت التدوين وعالم المدونين برضه فى سنة رابعة
كفاية كدة لاحسن انا خلاص هعيط بس اكيد انا زعلانة جدا جدا جدا

ميلاد انسانة جديدة

منذ ايام قليلة قررت ان اكون انسانة تانية غير التى اعرفها منذ اكثر من عشرين سنة عشتهم فى حياة فرضتها عليا الظروف لا اتدخل فيها بارادتى , حياة رسم ملامحها كل من حولى حتى اصبح
لا يوجد لحظة سعادة واحدة فى حياتى
لا مكان للعواطف عندى
لا امل فى حياتى, كان مبدا عندى ان اعيش متشائمة
لا احلام
لا مستقبل فى انتظارى
لا للحب , كنت بفخر ان قلبى حجر
لا ارادة لى فى الحياة
الخجل كان يلازمنى فى كل لحظة
كانت الحياة دائما فى عيونى سوداء
قررت ان اكون الانسانة التى بحلم بها ودائما يكون التاجيل لظهور هذه الانسانة فى حياتى لازم اكون انسانة اخرى تكون لى ارادة هى المتحكمة فى حياتى
ان اصنع السعادة لنفسى حتى لو كانت وهم
ان اكون متفائلة , يجب ان الغى التشائم من كل حياتى
لازم ان اضع امامى امال و احلام كى استطيع تحقيقها , ان افعل المستحيل من اجل تحقيقها
لازم اعيش بالحب ( ليس المقصود حب ولد وبنت , لكن قصدى حب الحياة والناس كلها)
واهم شى فى الانسانة الجديدة ان اقتل الهاجس الذى دمر حياتى السابقة , ان اقتل عدوى فى الحياة وهو (الخجل)
لازم يكون لى هدف من الحياة
لازم اكون انسانة ناجحة فى الحياة
لازم اعيش حياتى صح , مش هدفن نفسى تانى
لازم اسلوبى فى الحياة يتغير مع كل الناس
الانسانة الجديدة بالفعل بدات تتولد داخلى , وسوف اعمل المستحيل من اجل هذه الانسانة حتى تكبرداخلى وتحقق كل احلامها ولا اسمح لاحد انه يدمرها او يعوق مستقبلها
لما قررت ان اتغير فقولت لازم ابدا بكتب التنمية البشرية هى ممكن تساعدنى خاصة ان
انا اريد التغيير و ده السبب اللى انا لم اقوله يعنى انا لم قولت اقرا فى التنمية البشرية ليس من اجل التسلية او من المعرفة فقط لكن كان السبب الاساسى تغيير نفسى
وفكرت ايضا فى لعب رياضة فهى ممكن تساعدنى على تغيير نفسى
وبالفعل انا بدات اتغير ولاحظت التغيير انهارده عندما كنت فى حيرة بين المكتبات من اجل بحث , وشراء كتب اخرى , ما شعرت بتعب وكنت سعيدة , وزادت سعادتى لما رجعت وكان عندى ميعاد مع اصدقائى من ايام اعدادى فى بيت احدهما اول ما وصلت نزلت على طول وذهبت لهم وهناك ضحكنا وهزرنا وانا كنت عايزة اضحك اوى مش عارفة ليه على الرغم ان اللقاء انتهى بمشكلة كبيرة ربنا يستر فيها ان شاء الله بس السعادة اللى كانت داخلى رفضت دخول هذه المشكلة
لاحظت ان الانسان لو عايز يتغير بمجرد انه يفكر فى التغيير وعنده ارادة ممكن يتغير
ولو الانسان عايز يكون سعيد بمجرد ارادته فى السعادة ممكن يشعر بالسعادة
انا كتبت هذا البوست لسبب وهو ان ادون ما كنت عليه , وما اريد ان اكون عليه , وارجع له بعد فترة واشوف انا استطعت التغيير فعلا, ما الاشياء التى تغيرت داخلى وما بقى لم يتغير , هل بقيت فعلا انسانة اخرى ام لا؟

فضائحxفضائح

ده بقى التاج بتاع الفضائح ذى الكل ما بيقول عليه
الدور المرة ديه عليا فى الفضائح
انا اترددت كتييييييييييييييير قبل ما اعمله بس
قولت لازم اعمله وامرى لله علشان ماحدش يزعل
ونبدا الفضائح
خمس حاجات لا احد يعرفهم عنك؟
1- كنت مرة فى سنة اولى ثانوى واتنين اصحابى كنا فى حجرة الرسم واقعدين نتكلم ونرغى( بنات بقى ما فيش حاجة غير الكلام والرغى ونميمة ), المدرسة شفتنا وقالتلى قومى وقالتلى
انا مش عارفة انتم ذى شخصيات مختلفة واقعدين جنب بعض انت شكلك رقيقة خالص ازاى اقعد جنبهم
وصعبت عليها وقومتنى اقعد فى مكان تانى
بجد ساعتها انا بقيت فى نص هدومى واصحابى كمان اتكسفوا جدا وبعدها قالولى
هى ماتعرف انك زعيمة العصابة

2- كانت مرة صاحبتى عندى ودخلنا نعمل مع بعض عصير ليمون فدخلت المطبخ لقيت عرقسوس قالتلى
انت ليه بتعملوه فى البيت طب ما تشتروه جاهز
وانا ردت عليها بكل رخامة وقولتلها
ده الناس الخيبة هى اللى بتجيبه جاهز
وبعدين جئيت احط الليمون فى الخلاط فقالتلى
انت هتحطيه بقشره ده هيخليه يمرر
فانا ردت برده بكل رخامة وقولتلها
ده الناس الخيبة هى اللى تخليه يمرر
بس وبعدين عملت عصير الليمون واديت لاخويا الاول وبعدين احنا اخذنا الكوبتين ودخلنا البلكونة وقبل ما البنت ترفع كوب الليمون وتشرب كان اخويا جاى يقولى بصوت عالى
ايه الخيبة ديه حتى الليمون مش عارفة تعمليه اليمون مرر جدا
طبعا انا اتكسفت جدا وهى قاعدت تضحك عليا ههههههههههههههههه

3- انا كل يوم بروح الجامعة بالمترو كنت فى الاول بركب اى عربية مش مشكلة بس بعدين قررت انى اركب عربية السيدات وما فتكرش يوم ركبت فى العربية المشتركة غير وحصلى موقف غريب
انا ممكن اكتب كتاب من مواقفى فى المترو وخاصة فى العربية المشتركة
هحكى احدى صفحات كتابى انا فى المترو اللى هعمله بعد ما اخلص جامعة
كنت يوم ركبة العربية المشتركة الحمد لله كنت قاعدة على كرسى وطلع واحد
وساب كل العربية وجالى وقالى
قومى اصل انا ظهرى واجعانى
طبعا قومت معرفتش اقوله حاجة على فكرة هو كان فى سن الثلاثين
بس حسيت فعلا ان الرجالة ماتت فى 73

4- فى مرة اتقدم لى عريس الكل اقنعنى انى اقبله وانا كمان قولت ارفض ليه ما دمت انا مش مرتبطة اجرب وهى تجربة مش هخسر حاجة
كان جاى يوم مقابلة التعارف فى البيت ونلاقى العدد اللى جاى اد ايه
بدون استغراب سبعة فكرنى بفيلم (البحث عن فضيحة) المشهد بتاع محمد عوض لما اخذ العيلة كلها وراح يخطب , ووالدته جاية تبص بس فكرتنى بفيلم (ام العروسة) لما والدته راحت ما قالتش ولا كلمة وبتمصمص وبس , ووالده مسكنا واحد واحد وهاتك يا اسئلة
عرفت بقى انا ليه كان لازم ارفض وما ادخلش التجربة وقررت انى ان شاء الله هعمل المستحيل علشان ما احطش نفسى فى الموقف ده تانى حتى لو انا مش مرتبطة

5-هى لسة ما حصلتش بس انا بتمناها انا دائما بحلم بالسفر ماحدش يعرف الحلم ده خالص حتى لما بتكلم مع حد دائما بتكلم على السفر على انه فسحة مش , اكتر لكن انا دائما بفكر فى السفر هروب من الحياة وكل مشكلة بتحصلى بفكر فى السفر

امرروه لمين؟
heba
ولاى حد لسة مش عمله وعايز يعمله

يا التاج .. يا السجن
وصلنى التاج من سمسم بهذا النص
اليك هذا التاج...إما ان تجوبيه وإما سجن المغول مدي الحياة مع حسن الهلالي جوز ياسمينة اللي خانوه بدران اللي كان شغال مع السيد شاهين اللي هو كمال الشناوي
فانا مضطرة اجاوب على كل اسئلة التاج بدل من السجن
واليكم اجاباتى
اسم مدونتك؟
houty
ما لوش معنى طبعا
لماذا اخترته.. ماذا تقصد به؟
اخترت الاسم علشان ده الاسم اللى انا معروفة

به على النت

هو اسم الايميل بتاعى

واسمى على الماسنجر

يعنى كل اصحابى على النت

او خارج النت عارفنى به
اكيد لا اقصد به اى شى لا سياسة ولاانقلابات ولا حاجة خالص
هل فكرت في إغلاق المدونة.. والسبب؟
نعم

..لان انا ما كنتش اعرف اى مدونات تانية

ما كنتش اعرف اى حاجة عن المدونات

سوى ان انا عملت المدونة

لاضع فيها المقالات اللى بيطلبها مننا المعيد

يعنى من الاخر علشان درجات اعمال السنة
صورتك ف المدونة، رمزيتها؟
ده صورة القط اللى كان عندى

وانا كنت بعشقه كان اسمه كيكو
انا ممكن اتكلم عليه لحد ما تقولوه ايه المجنونة ديه

او تفكروا انى بتكلم على حبيبى اللى غدر بيا وسابنى
يعنى الصورة لا ترمز لشى اللى ذكرى فى خيالى
طبيعة كتابتك في المدونة بشكل عام..

سياسة.. قصة.. عبث.. كلام فاضي؟
فى البداية كانت مقالات صحفية

حتى لو نزلتوه تحت شوية هتقراوا مقالات اسلوبها ركيك

بما انى مشروع صحفية

لكن بعد كدة شوية كلام انا كتبته معرفش طبيعته ايه

,بكتب اى حاجة ممكن تكون فى دماغى اللى وجعانى
لماذا تدون أصلاً؟

زى ما قولت البداية كان علشان العملى

لكن بعد كدة قولت لنفسى

بما انى مش بتكلم مع حد

او مش بحكى لحد احلامى

اوافكارى

او احزانى

قولت ادونها جايز حد يشاركنى فيها

او اخرج اى شى داخلى بدل ما اموت من كتمانه
أحلى جملة قيلت لك في وصف مدونتك؟
بما انى جديدة فى عالم المدونات

وعدد قليل جدا جدا اللى يعرف مدونتى

بالتالى التعليقات قليلة جدا مافيش وصف معين اقدر احدده
التعليقات بالنسبة لك.. أهميتها؟
ساعات بحس انها مهمة جدا

خاصة انى بدون علشان حد يشاركنى فى احلامى

و احزانى

وافكارى
أحلى بوست كتبته.. ضع اللينك.. ثم اذكر لماذا؟
بجد مش عارفة اصل انا مش بكتب كتير

واصعب حاجة ان حد يحكم على نفسه
أفضل مدونة قرأتها.. يمكن اختيار عدة مدونات؟
فعلا فى مدونات كتيييييييييير حلوة جدا

مش هعرف اقول مين

ولا مين

بس هقول على واحدة بس انا بحبها

اوى وبحس انها بتجمع كل المدونيين هى

سمراء النيل

بس بجد فى كتيييييييييييير حلوين
أفضل بوست قرأته.. يمكن اختيار أكثر من بوست.. ومتنساش اللينك؟
ده سوال صعب اوى

قرات حاجات كتيييييييييير حلوة جدا

يعنى مش فاكرة بس ممكن تكون
الليل الدافئ ل

the eagles
هل خسرت صديق بسبب كتابة هنا؟
لا مش خسرت حد

اصلى لسة ما كتبتش حاجة تخلينى اخسر حد
حد قل أدبه ف التعليق.. إيه رد فعلك؟
الحمد لله ماحدش عمل كدة معايا
بس اكيد ما فيش رد غير انى همسح تعليقه
أسوأ مدونة.. الإجابة إجبارية.. ويمكن اختيار عدة مدونات.. هي كتيرة أصلاً :) ؟
هقولها للمرة المائة

انى جديدة فى عالم المدونات

لسة ما شفتش مدونات كتيرة
بس بجد العدد القليل اللى انا شفته

ما فيش فيهم مدونة سئ
أسوأ بوست.. لازم تجاوب.. ويسمح بتعدد الاختيارات؟
اسوا بوست انا مش عارفة لسة

بس ممكن اقول على البوست اللى انا كتبته

هو كان مقال

كان اسمه مسئول اخطا

بس انا عملته

save in draft
أسوأ مدون.. ما هو حاتجاوب حاتجاوب؟
لما هوصله هبقى اقول عليه على طول مش هنكره عليكم

بعد تنهيدة خلص اخيرا

امرروه لمين
اقصد ادبس مين فيه
the eagles
malak
heba
واحد من الناس
الاباصيرى
ملك المصرية

انسانة

انا هقول عن طبع فيا بجد مش عارفة اذا كان طبع صح ولا غلط
انا دائما بظهر بصورة معينة وهى انى انسانة مافيش حاجة بتاثر فيها
انى بضحك كتير ومافيش حاجة ممكن تخلينى ابكى
انى قلبى حجر مش بيبكى ولا يحس بشى ,صاحبة القلب الجامد
ان مافيش اى هموم عندى ولا مشاكل ولا اى حاجة ممكن تخلينى حزينة
بجد انا مش عارفة ليه بظهر بهذه الصورة , بقول الناس مالهاش ذنب انى اقابلهم بحزن وهم وانهم اكيد ماعندهمش حل ليا او هيسمعوا ويقولولى معلش وانا كدة استفدت ايه و كمان انا مش بعرف احكى بسهولة مشاكلى تقريبا مش بقول خالص ولا حتى لاقرب اصدقائى على الرغم ان ممكن يكون منهم من بتعتبرنى صديقتها الانتيم بس انا مش بحس كدة ناحيتها وتقريبا كل اصدقائى بيقولولى على كل حاجة فى حياتهم لكن انا مش بعمل كدة مع ولا واحدة منهم مافيش تقريبا غير واحدة بس هى اللى ممكن اقولها على بعض الحاجات
انا بقول الكلام ده ليه اصل امبارح حصل مشكلة فعيط حاولت بقدر الامكان ان ماحدش يشوفنى اصل انا مش بحب حد يشوفنى و انا بعيط لكن اخويا كان جنبى واستغرب قوى وقالى انت بتعيطى!!!! ليه الموضوع مش مستاهل كدة ديه حاجة عادية وطبع انا ما قولتش انا بعيط ليه اصلى كنت شايفة الموضوع من وجهه نظر تانية
مش هى ديه المشكلة اللى انا بتكلم فيها نرجع لموضوع طبعى
فى الوقت اللى كنت بعيط فيه صاحبتى اتصلت بيا ومن اول كلمة عرفت على طول انى بعيط
وطبعا سالتنى ليه وانا معرفتش اتكلم فقالتلى شويه وهكلمك تانى وفعلا
اتكلمت بعد شوية فكنت هديت وسالتنى ليه وبرضوه ما قولتلهاش
المهم هى قالتلى كلمة مش اول مرة الكلمة ديه حد يقولها ليا
انت بتعيطى!!!! ديه اكيد حاجة جامدة
وكانى اخر انسانة ممكن تعيط كانى ما عنديش احساس على الرغم ان احنا نعرف بعض من عشر سنين ومرة من فترة واحدة تانية قالتلى
انا فرحت اوى لما سمعتك بتعيطى وقولت صاحبتى بتعيط
كانه شى انا غريبة عنه او كانه حصل معجزة
واضح ان ما فيش حد فاهمنى واحساس الوحدة اللى عندى صحيح وفى ازدياد
لكن انا انسانة عادية جدا ببكى وبضحك وبعرف افرق بين الموقف اللى اضحك فيه والموقف اللى احزن فيه , بس انا ببكى لوحدى لان انا زى ما قولت مش بعرف ابكى امام احد مهما كان الانسان ده انا بجد ممكن اتكلم واهزر ويكون داخلى بركان من الحزن انا مهما كنت حزينة انا مش بوضح ده لحد , انا فعلا فى الفترة الاخيرة بقيت حساسة جدا بس ما حدش يعرف ده خالص , اصل ماحدش فاهمنى

انا كنت عايزة حد يفهمنى من غير ما اتكلم
انا بجد كتبت الوضوع ده علشان عايزة اعرف اذا كنت انا صح ولا غلط فى انى لا اريد مشاركة احد فى احزانى ولا همومى وبحتفظ بيها لنفسى
لو صح بس كل اللى حوليا اصبحت فى نظرهم كانى انسانة فارغة , ولو غلط انا مش هعرف اغير من نفسى لان ده طبع فيا.

حادثة بسبب خناقة

اتذكر موقف لن انساه فى حياتى
كنت انا ورحاب صديقتى وجارتى
كنا وقتها فى اولى اعدادى وكان
معانا صديقتنا الثالثة سارة بس
كانت اكبرمننا بسنة كانوا وقتها
اعز اصدقائى انتيم يعنى
كنا رايحين المدرسة وكانت قريبة
من البيت واحنا بنعدى الشارع
ده على فكرة شارع صلاح سالم
قبلتنا بنت جاية من ناحية المدرسة
قالت : ارجعوا المدرسة فيها خناقة
من المفترض كنا نرجع لكن سارة
بلا تفكير من غير ما تنظر حولها
شدت رحاب من ايدها وقالتلها يلا!!!!
وعدوا الشارع رايحين المدرسة
وانا ابص جانبى مش موجودين
ابص امامى مش موجودين
اقول جايز لحقوا يعدوا طب هم
فييييييييييييييين
و الشارع مرة واحدة وقف امامى
وابص تحت العربية واشوف واحد شايل رحاب
وواحد تانى شايل سارة من تحت العربية
انا ساعتها مكنتش عارفة اعمل كنت محتاسة
والناس كالعادة اتخنوا مع الرجل صاحب العربية
على الرغم انه هو مش غلطان وقالوا له وديهم
مستشفى لكن انا قولتله لا احنا ساكنين قريب وهما
خلاص كويسين
واحد زعلى وقالى كويسين فين ده
انا بصراحة كنت خايفة عليهم ليخطفهم
انا كنت بترعش بطريقة غريبة جدا
رحاب عيطت جامد جدا
لكن سارة كان لها موقف تانى
وراجل بيطلعها من تحت العربية
ولسه بتفوق كانت بتعدل شعرها!!!
بعد كدة الحادثة اتفضت وما عرفش
ايه اللى حصل ورحنا المدرسة ما رجعناش البيت
كانت رحاب ماشية بتعيط وسارة ماشية بتضحك
طبعا رحنا المدرسة وكانت مقفولة لان كان فيها خناقة
فرجعنا البيت و من اول الشارع
الناس شافوا رحاب تعبانة
فقام ولد شالها وطلعها البيت
وسارة اللى كانت بتضحك
جات عند بيتها وفتحت عياط غريب
وانا بقولها ايه اللى حصل
ما انتى كنتى بتضحكى
معرفتش ايه السبب
وطبعا كل واحدة راحت للدكتور
سارة كان عندها كدمات
ورحاب برضوه كان عندها كدمات
بس الدكتور كتب لها اجازة اسبوع
الحمد لله انها جات على اد كدة
والحمد لله بقينا لما بنفتكر الموقف ده بنضحك ..............